Íslensku hljóðbókaverðlaunin
2025 vinningshafar!
Bestu hljóðbækur ársins 2024 voru verðlaunaðar á Storytel Awards hátíðinni 27. mars 2025. Sjáðu hér alla vinningshafa.
Bestu hljóðbækur ársins 2024 voru verðlaunaðar á Storytel Awards hátíðinni 27. mars 2025. Sjáðu hér alla vinningshafa.
Sveindís Jane - saga af stelpu í fótbolta
Höfundur
Sveindís Jane Jónsdóttir og Sæmundur Norðfjörð
Lestur
Álfrún Örnólfsdóttir
Útgefandi
LOKI
Umsögn dómnefndar
Hetjusaga ungrar stúlku með einstakan bakgrunn sem hefur þurft að yfirstíga miklar áskoranir í einkalífi sem og samfélaginu. Þrátt fyrir allt þetta mótlæti yfirstígur hún alla erfiðleika og stendur uppi sem sigurvegari, innan vallar sem og utan. Bókin gefur einstaka innsýn inn í annan menningarheim og sýnir fjölbreytileika íslensks samfélags. Einlæg og skemmtileg frásögn með hlýjum og notalegum lestri. Saga af mótun og áskorunum sterkrar stúlku og frábærrar fyrirmyndar.
Valskan
Höfundur
Nanna Rögnvaldardóttir
Lestur
Hildigunnur Þráinsdóttir
Útgefandi
Forlagið
Umsögn dómnefndar
Sagan um prestsdótturina Völsku er vel stíluð og lifandi saga, jafnframt merkileg heimild byggð á lífi formóður höfundar. Með grípandi frásagnarmáta sínum bíður Nanna okkur með í ferðalag um heim harðrar lífsbaráttu en líka ástar og þrautseigju, á tímum þar sem oft var lítið pláss fyrir allt litróf mannlegra tilfinninga. Persónugallerí sögunnar er bæði litríkt og eftirminnilegt, hvort sem um er að ræða aðal- eða aukapersónur, og lesandi á auðvelt með að setja sig í spor hinnar einstöku og mannlegu Völsku. Það er unun að heyra hvernig Nanna notar dýrmæt og gömul orð sem eru smám saman að hverfa úr okkar tungumáli.
Framúrskarandi lestur Hildigunnar Þráinsdóttur setur svo punktinn yfir i-ið. Með góðum tilbrigðum, áheyrilegum og áreynslulausum lestri, kemur hún þessari stóru sögu afar vel til skila.
Dætur regnbogans
Höfundur
Birgitta H. Halldórsdóttir
Lestur
Svandís Dóra Einarsdóttir
Útgefandi
Storyside
Umsögn dómnefndar
Skáldsaga Birgittu bar af í þessum flokki. Fallegt og flæðandi tungumál og hrífandi saga sem er bæði hjartnæm og rómantísk og á sama tíma jarðbundin. Einnig er mjög skemmtilegt hvernig persónur úr öðrum bókum hennar fléttast inn og út. Fallegur og hlýr boðskapur sem sæmir vel ljúflestursbókmenntum. Bókin er einnig afar vel lesin og hæfir sögunni vel.
Morðin í Dillonshúsi
Höfundur
Sigríður Dúa Goldsworthy
Lestur
Birgitta Birgisdóttir og Sigríður Dúa Goldsworthy
Útgefandi
Ugla
Umsögn dómnefndar
Sagan hrífur lesandann frá byrjun. Höfundur gerir lífshlaupi forfeðra sinna skil á einstaklega mannlegan og áreynslulausan hátt og snertir djúpt. Einnig gefur sagan fallega innsýn inn í tíðarandann. Þeir tragísku atburðir sem titillinn ber með sér, verða næstum aukaatriði og þá finnst okkur að ætlunarverki höfunda hafi sannarlega verið náð - að heiðra minningu forfeðra sinna.
Bókin er afar vel lesin af Birgittu Birgisdóttur og dansar þessa fínu línu að gera nóg, en leyfa samt myndum að vakna sjálfum í huga hlustanda.
Heim fyrir myrkur
Höfundur
Eva Björg ´Ægisdóttir
Lestur
Aníta Briem og Berglind Alda Ástþórsdóttir
Útgefandi
Bjartur
Umsögn dómnefndar
Eva Björg sýnir enn og aftur einstaka hæfni sína í að byggja upp andrúmsloft þar sem grunsemdir krauma undir yfirborðinu og sannleikurinn kemur sífellt á óvart. Frábær flétta og trúverðugar persónur. Með lifandi sögusviði og ísmeygilegri frásagnaraðferð leiðir hún okkur í gegnum flókið net minninga, drauma og duld tengsl úr fortíðinni, þar sem hvarf sextán ára stúlku og óuppgerð leyndarmál mynda áþreifanlega spennu til hinsta orðs. Aníta Briem og Berglind Alda Ástþórsdóttir túlka systurnar Marsí og Kristínu á einstakan hátt sem glæðir söguna lífi og eykur tengsl lesanda við persónurnar. Báðar hafa þær góða tilfinningu fyrir tungumálinu og áheyrilegar raddir.
Lestrarklefinn
Heiðursverðlaun
Lestrarklefinn
Heiðursverðlaun
Fyrir framlag til umræðu um bókmenntir og lestrarmenningu á Íslandi hlaut Lestrarklefinn sérstök heiðursverðlaun Íslensku hljóðbókaverðlaunanna. Lestrarklefinn er grasrótar-vettvangur sem hefur frá árinu 2018 unnið óeigingjarnt og kraftmikið starf við að halda bókmenntaumræðu á Íslandi lifandi. Á vefnum er fjallað af ástríðu og fagmennsku um bækur í öllum formum – hvort sem um er að ræða prentaðar bækur, hljóðbækur eða rafbækur – auk leikhúss og menningar í víðara samhengi. Með vandaðri umfjöllun, fjölbreyttu efni og persónulegri nálgun hefur Lestrarklefinn veitt aðgengilega bókmenntaumfjöllun og tengt saman lesendur, höfunda og verk á lifandi hátt.
Fyrir þetta ómetanlega framlag til lestrarmenningar hlaut Lestrarklefinn heiðursverðlaun Íslensku hljóðbókaverðlaunanna 2025.
Verðlaununum veittu viðtöku stofnendur og ritstjórar Lestrarklefans, Díana Sjöfn Jóhannsdóttir, Katrín Lilja Jónsdóttir og Rebekka Sif Stefánsdóttir.
