Íslensku hljóðbókaverðlaunin
2026 vinningshafar!
Bestu hljóðbækur ársins 2025 voru verðlaunaðar á Storytel Awards hátíðinni 17. mars 2026. Sjáðu hér alla vinningshafa.
Bestu hljóðbækur ársins 2025 voru verðlaunaðar á Storytel Awards hátíðinni 17. mars 2026. Sjáðu hér alla vinningshafa.
Kærókeppnin
Höfundur
Embla Bachmann
Lestur
Embla Bachmann og Mikael Kaaber
Útgefandi
Bókabeitan
Umsögn dómnefndar
Kærókeppnin er frumleg, stórskemmtileg og fyndin saga sem rígheldur lesanda frá upphafi til enda og forðast listilega að lenda í gryfjum hefðbundinna klisja unglingabóka. Lesararnir tveir koma mismunandi sjónarhornum aðalpersónanna vel til skila í lifandi og blæbrigðaríkum lestri. Að hafa unga lesara að lesa fyrir unglinga eykur trúverðugleika sögunnar og nýtir möguleika hljóðbókaformsins vel.
Valskan
Höfundur
Ásdís Ingólfsdóttir
Lestur
Hildigunnur Þráinsdóttir
Útgefandi
Storyside / Sæmundur
Umsögn dómnefndar
Viðkomustaðir er hrífandi og áhrifamikil skáldsaga um unga stúlku sem hrekst frá Íslandi alla leiðina í Vesturheim. Hún berst í gegnum erfiða tíma með þrautseigju og bjartsýni. Viðfeðmi karaktera og efnistaka gefur manni góða innsýn í þá miklu breytingar sem fylgdu því að flytja til Vesturheims.
Frásögnin er einlæg og situr eftir í huga þess sem hlustar. Björt og falleg rödd Valýar Þórsteinsdóttur hentar sögunni einstaklega vel og er laus við óþarfa tilþrif. Átakanleg saga eins og Viðkomustaðir þarfnast ákveðins viðnáms sem jafnar hana út sem Valý gerir snilldarlega.
Fiðrildaherbergið
Höfundur
Lucinda Riley
Lestur
Álfrún Helga Örnólfsdóttir
Útgefandi
Benedikt bókaútgáfa
Þýðing: Valgerður Bjarnadóttir
Umsögn dómnefndar
Fiðrildaherbergið er margradda örlagasaga um Pósu og fjölskyldu hennar á Austur-Englandi. Efnistökin eru spennandi og áhugaverð og höfundur kemur tíðarandanum um miðja tuttugustu öld í Bretlandi vel til skila.
Lestur Álfrúnar Örnólfsdóttur er óaðfinnanlegur og hentar bók sem þessari gífurlega vel. Bæði flæði og skýrleiki er til fyrirmyndar og innlifunin rétt tímasett. Lesturinn glæðir bókina lífi og heldur athygli þess sem hlustar.
Mennska
Höfundur
Bjarni Snæbjörnsson
Lestur
Bjarni Snæbjörnsson
Útgefandi
Forlagið
Umsögn dómnefndar
Í Mennsku segir Bjarni Snæbjörnsson af hispursleysi frá uppvexti sínum sem samkynhneigður maður í smábæ á Vestfjörðum, frá leið sinni út úr skápnum og glímunni við ótta og skömm á þeirri vegferð. Bókin er á köflum átakanleg en einnig meinfyndin, og gefur góða innsýn í þá innri og ytri baráttu sem margt hinsegin fólk hefur þurft að eiga í til að komast í sátt við sjálft sig og samfélagið.
Höfundur les bókina sjálfur af leikni og einlægni, sem hentar vel svo persónulegri frásögn, og hlustendur hrífast með sorgum Bjarna og sigrum.
Hildur
Höfundur
Satu Rämö
Lestur
Sigríður Eyrún Friðriksdóttir
Útgefandi
Forlagið
Þýðing: Erla Elíasdóttir Völudóttir
Umsögn dómnefndar
Satu Rämö kveðjur sér hljóðs í heimi norrænna glæpasagna með titilpersónunni Hildi og kemur um leið Ísafirði á kortið sem litlum morðbæ á hjara veraldar. Með skemmtilegri og hlýrri persónusköpun og áhugaverðri fléttu fortíðar og nútíðar að vopni tekst höfundi að skapa trúverðugan sagnaheim sem situr eftir hjá lesandanum.
Lestur Sigríðar Eyrúnar Friðriksdóttur glæðir söguna lífi og hrífur fólk með sér alla leið á Vestfirði í morðráðgátu þar sem engin leið er að giska á hver morðinginn er.
Bjarni Fritzson
Heiðursverðlaun
Bjarni Fritzson
Heiðursverðlaun
Heiðursverðlaun Íslensku hljóðbókaverðlaunanna 2026 hlaut rithöfundurinn, sálfræðingurinn og fyrirlesarinn Bjarni Fritzson. Þau fær hann fyrir ómetanlegt starf við fræðslu barna og ungmenna og framlag sitt til barnabókmennta. Þá hefur hann með námskeiðum, fyrirlestrum og skemmtilegum sögum aukið lestraráhuga og stuðlað að sjálfstyrkingu barna og ungmenna.
Bjarni er höfundur vinsælla sjálfstyrkingarbóka fyrir börn og bókaseríunnar um Orra óstöðvandi og Sölku, sem notið hafa mikilla vinsælda og trónað á topplistum. Í bókum sínum sameinar hann frásagnargleði, sálfræði og fræðslu á aðgengilegan hátt og talar beint inn í heim barna, sérstaklega drengja, án þess að útiloka aðra lesendur.
Með sögum sínum hefur Bjarni stuðlað að auknum lestraráhuga barna sem annars tengja sig síður við hefðbundið lesefni. Í verkum hans eru tilfinningar, hugrekki og vinátta í forgrunni og lesturinn verður að spennandi ævintýri sem styrkir sjálfsmynd og sjálfstraust ungs fólks.
Bjarni er með B.S. gráðu í sálfræði og framhaldsmenntun í félags- og vinnusálfræði og jákvæðri sálfræði. Hann er jafnframt eigandi sjálfstyrkingarfyrirtækisins Út fyrir kassann, þar sem hann heldur námskeið og fyrirlestra fyrir börn, ungmenni og foreldra. Með starfi sínu hefur hann haft áhrif langt út fyrir blaðsíður bókanna og hvatt ungt fólk til sjálfstrausts og jákvæðrar sjálfsmyndar.
Kristín Tómasdóttir afhenti Bjarna heiðursverðlaun Íslensku hljóðbókaverðlaunanna 2026.
